0 
0 
કોડીનાર : જીવનદીપ હેલ્થ એજ્યુકેશન એન્ડ ચેરીટેબલ ટ્રસ્ટ, કોડીનાર દ્વારા સંચાલિત દિવ્યાંગ બાળકોના ડે કેર સેન્ટર ખાતે મકરસંક્રાંતિ પર્વની ભવ્ય, આનંદમય અને સમાવેશક (Inclusive) રીતે ઉજવણી કરવામાં આવી હતી.
ઉતરાયણ પર્વના પાવન અવસરે સંસ્થાના દિવ્યાંગ બાળકો તેમજ યુવાનોએ સાથે મળીને પતંગ ઉડાવી ઉત્સાહપૂર્વક આનંદ વ્યક્ત કર્યો હતો. રંગબેરંગી પતંગો સાથે આકાશને ઝળહળતું બનાવતાં બાળકોના ચહેરા પર ખુશી અને ઉત્સાહ સ્પષ્ટ દેખાતો હતો. કાર્યક્રમ દરમિયાન બાળકો માટે નાસ્તાની સુવિધા ઉપલબ્ધ કરાવવામાં આવી હતી.
આ ઉજવણીને વધુ આનંદમય બનાવવા માટે સંગીતની વ્યવસ્થા કરવામાં આવી હતી. સંગીતના તાલે દિવ્યાંગ બાળકોએ મોજ-મસ્તી કરી, રાસ-ગરબા રમ્યા અને સહભાગિતાભેર ઉત્સવ ઉજવ્યો હતો. સમગ્ર કાર્યક્રમ દરમિયાન દિવ્યાંગ બાળકોને સમાજની મુખ્યધારામાં જોડવાની ભાવનાને વિશેષ મહત્વ આપવામાં આવ્યું હતું.
આ કાર્યક્રમનો મુખ્ય હેતુ દિવ્યાંગ બાળકોમાં આત્મવિશ્વાસ, સહભાગિતા અને સામાજિક જોડાણની ભાવનાનો વિકાસ કરવો તેમજ તેમને તહેવારોની ખુશીમાં સમાન રીતે સામેલ કરવાનો હતો. કાર્યક્રમના અંતે મકરસંક્રાંતિ પર્વને અનુલક્ષીને દિવ્યાંગ બાળકો માટે વિશેષ ભોજનની વ્યવસ્થા કરવામાં આવી હતી.
આ સમગ્ર કાર્યક્રમને સફળ બનાવવા માટે સંસ્થાના કાર્યકરો, વિશેષ શિક્ષકો તથા સ્વયંસેવકો દ્વારા ઉત્સાહપૂર્વક સહયોગ આપવામાં આવ્યો હતો. તેમની હાજરી અને માર્ગદર્શનથી કાર્યક્રમ શાંતિપૂર્ણ અને સફળતાપૂર્વક સંપન્ન થયો.
કાર્યક્રમને સફળ બનાવવા સંસ્થાના એ.ડી.જાદવ, આરીફભાઈ ચાવડા, નાઝીમાંબેન જુણેજા, ભાવનાબેન રાઠોડ, અમિતાબેન ચાવડા, રાકેશભાઈ બેરડીયા, તનવીરભાઈ ચાવડા, ડૉ ભરતભાઈ રાઠોડ, ડૉ.નિકુંજભાઈ ચુડાસમા, વિપુલભાઈ સોલંકી તથા ઇન્ટરશીપના વિધાર્થીઓએ જહેમત ઉઠાવી હતી.
રિપોર્ટ રહીશ બાનવા કોડીનાર
